Google Review: ಟಾಪ್ 20 ಗೂಗಲ್ ರಿವ್ಯೂವ್​ ಪಟ್ಟಿಯಲ್ಲಿ 15ನೇ ಸ್ಥಾನ ಪಡೆದ ಮೈಸೂರು ಅರಮನೆ

ಮೈಸೂರು ; ಮೈಸೂರಿನ ಹೆಗ್ಗುರುತಾದ ಅಂಬಾವಿಲಾಸ ಅರಮನೆಗೆ ವಿಶ್ವ ಮನ್ನಣೆ ದೊರೆತಿದೆ. ಪ್ರತಿಷ್ಠಿತ ವಿಶ್ವದ ಟಾಪ್ 20 ಗೂಗಲ್ ರಿವ್ಯೂವ್​ ಪಟ್ಟಿಯಲ್ಲಿ ಮೈಸೂರು ಅರಮನೆಗೂ ಸ್ಥಾನ ಲಭಿಸಿದೆ.

ಮೈಸೂರು ಜಿಲ್ಲೆ ಪ್ರವಾಸೋದ್ಯಮದ ತಾಣವಾಗಿದ್ದು, ದಿನನಿತ್ಯ ಸಾವಿರಾರು ಪ್ರವಾಸಿಗರು ಇಲ್ಲಿಗೆ ಭೇಟಿ ನೀಡುತ್ತಾರೆ. ಮೈಸೂರು ದಸರಾವು ಪ್ರವಾಸಿಗರ ಕೇಂದ್ರ ಬಿಂದುವಾಗಿದ್ದು, ಅಂಬಾವಿಲಾಸ ಅರಮನೆಯನ್ನು ನೋಡಲು ದೇಶ-ವಿದೇಶಗಳಿಂದ ಪ್ರತಿ ವರ್ಷ 6 ದಶಲಕ್ಷ ಪ್ರವಾಸಿಗರು ಬರುತ್ತಾರೆ. ಮೈಸೂರು ದಸರಾ, ಜಂಬೂ ಸವಾರಿ ಹಾಗೂ ಅಂಬಾವಿಲಾಸ ಅರಮನೆಯ ಕುರಿತು ಕೋಟ್ಯಂತರ ಮಂದಿ ಗೂಗಲ್​ನಲ್ಲಿ ಸರ್ಚ್ ಮಾಡುತ್ತಾರೆ. ಸಾವಿರಾರು ಮಂದಿ ಅರಮನೆಯ ಬಗ್ಗೆ ತಿಳಿದುಕೊಳ್ಳಲು ಗೂಗಲ್​ಗೆ ಹೋಗುತ್ತಾರೆ.

ಇದೀಗ ಗೂಗಲ್ ಪ್ರಕಟಿಸಿರುವ ವಿಶ್ವದ ಟಾಪ್ 20 ರಿವ್ಯೂವ್​ ತಾಣಗಳಲ್ಲಿ ಮೈಸೂರಿನ ಅಂಬಾ ವಿಲಾಸ ಅರಮನೆಗೆ 15ನೇ ಸ್ಥಾನ ಲಭಿಸಿದೆ. ಗೂಗಲ್ ಮ್ಯಾಪ್​ಗೆ ಭೇಟಿ ನೀಡಿದ ವೇಳೆ ನೀಡುವ ರಿವ್ಯೂವ್ (ಪ್ರತಿಕ್ರಿಯೆ) ಆಧಾರದ ಮೇಲೆ ಈ ಪಟ್ಟಿ ಬಿಡುಗಡೆ ಮಾಡಲಾಗಿದ್ದು, ಮೈಸೂರು ಅರಮನೆಗೆ ಒಟ್ಟು 193,177 ರಿವ್ಯೂವ್ ಬಂದಿದ್ದು, ವಿಶ್ವದ ಪ್ರಮುಖ ತಾಣಗಳ ಪಟ್ಟಿಯಲ್ಲಿ 15 ನೇ ಸ್ಥಾನ ಗಳಿಸಿದೆ.

ಗೂಗಲ್ ಪ್ರಕಟಿಸಿರುವ ಟಾಪ್ 20 ಪಟ್ಟಿಯಲ್ಲಿ ಅಂಬಾವಿಲಾಸ ಅರಮನೆಗೆ ಆಗ್ರಾದ ತಾಜ್ ಮಹಲ್​ಗಿಂತ ಹೆಚ್ಚಿನ ರಿವ್ಯೂವ್​ ಬಂದಿದೆ. ತಾಜ್ ಮಹಲ್​ಗೆ ಒಟ್ಟು 187,345 ರಿವ್ಯೂವ್​ ಬಂದಿದ್ದು, ಪಟ್ಟಿಯಲ್ಲಿ 17 ನೇ ಸ್ಥಾನದಲ್ಲಿ ಇದೆ. ದೇಶದಲ್ಲಿ ಅತೀ ಹೆಚ್ಚು ಪ್ರವಾಸಿಗರನ್ನು ಸೆಳೆಯುವ ತಾಣಗಳಲ್ಲಿ ತಾಜ್ ಮಹಲ್ ಹಾಗೂ ಅಂಬಾವಿಲಾಸ ಅರಮನೆ ಟಾಪ್ ಸ್ಥಾನದಲ್ಲಿರುವುದು ಹೆಮ್ಮೆಯ ವಿಷಯವಾಗಿದೆ.