ಪ್ರಧಾನಿ ಇಮ್ರಾನ್ ಖಾನ್ ಸರ್ಕಾರದ ವಿರುದ್ಧದ ಅವಿಶ್ವಾಸ ನಿರ್ಣಯದ ಮೇಲಿನ ಮತದಾನವನ್ನು ಮುಂದಿನ ವಾರಕ್ಕೆ ವರ್ಗಾಯಿಸಬಹುದು ಎಂದು ಪಾಕಿಸ್ತಾನದ ಫೆಡರಲ್ ಸಚಿವ ಫವಾದ್ ಚೌಧರಿ ಶನಿವಾರ ತಿಳಿಸಿದ್ದಾರೆ.
ಪಾಕಿಸ್ತಾನದ ರಾಷ್ಟ್ರೀಯ ಅಸೆಂಬ್ಲಿ ಅಧಿವೇಶನದ ಪ್ರಕ್ರಿಯೆಗಳು ಸರ್ಕಾರದ ವಿರುದ್ಧ ಅವಿಶ್ವಾಸ ನಿರ್ಣಯವನ್ನು ತೆಗೆದುಕೊಳ್ಳಲು ನಿರ್ದಿಷ್ಟ ಆದೇಶದೊಂದಿಗೆ ಪ್ರಾರಂಭವಾಗುತ್ತಿದ್ದಂತೆ ಮತ್ತು ಸದನದ ಹೊಸ ನಾಯಕರ ಆಯ್ಕೆಗೆ ಇಂದು ಚಾಲನೆ ದೊರೆತಿದೆ ಎಂದು ಜಿಯೋ ನ್ಯೂಸ್ ವರದಿ ಮಾಡಿದೆ. ಆಡಳಿತಾರೂಢ ಪಾಕಿಸ್ತಾನ್ ತೆಹ್ರೀಕ್ ಇ ಇನ್ಸಾಫ್ ಪಿಟಿಐ ಪಕ್ಷವು ವಿದೇಶಿ ಪಿತೂರಿಯ ಕುರಿತು ಸುದೀರ್ಘ ಭಾಷಣವನ್ನು ನೀಡಲು ಸಂಸದರಿಗೆ ನಿರ್ದೇಶನ ನೀಡುವ ಮೂಲಕ ಪ್ರಕ್ರಿಯೆಯನ್ನು ನಿಧಾನಗೊಳಿಸಲು ತನ್ನ ಕಾರ್ಯತಂತ್ರವನ್ನು ಸಿದ್ದಗೊಳಿಸಿದೆ ಎನ್ನಲಾಗಿದೆ.
ಕಾನೂನು ಸಚಿವರು ಹಾಗೂ ವಿದೇಶಾಂಗ ಕಾರ್ಯದರ್ಶಿ ಬೆದರಿಕೆ ಪತ್ರದ ಬಗ್ಗೆ ಸದನಕ್ಕೆ ತಿಳಿಸುತ್ತಾರೆ, ಆದ್ದರಿಂದ ಅವಿಶ್ವಾಸದ ಮೇಲಿನ ಮತದಾನ ಇಂದು ನಡೆಯದೇ ಇರಬಹುದು ಮತ್ತು ಮುಂದಿನ ವಾರಕ್ಕೆ ಮುಂದೂಡಬಹುದು ಎಂದು ಹೇಳಿದ್ದಾರೆ. ಮೂಲಗಳ ಪ್ರಕಾರ ನ್ಯಾಯಾಲಯದ ಆದೇಶದ ಹೊರತಾಗಿಯೂ, ಪಿಟಿಐ ನೇತೃತ್ವದ ಸರ್ಕಾರ ಇಂದು ಅವಿಶ್ವಾಸ ನಿರ್ಣಯದ ಮೇಲೆ ಮತದಾನವನ್ನು ನಡೆಸದಿರಲು ಯೋಜಿಸಿದೆ ಎನ್ನಲಾಗಿದೆ.
