ದಿಬ್ರುಗಡ: ದೇಶದ ಪ್ರಮುಖ ತೈಲ ಕಂಪೆನಿಗಳಳಲ್ಲಿ ಒಂದಾದ ಇಂಡಿಯನ್ ಆಯಿಲ್ ಅಸ್ಸಾಂನಲ್ಲಿ ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ವೇದಿಕೆ ಹಿಂದಿನ ಬೃಹತ್ ಪರದೆಯಲ್ಲಿ ಪೋರ್ನ್ ವಿಡಿಯೋದ ತುಣುಕು ಪ್ರಸಾರವಾಗಿದ್ದು, ಕೇಂದ್ರ ಸಚಿವ ರಾಮೇಶ್ವರ ತೇಲಿ, ಅಸ್ಸಾಂ ಕಾರ್ಮಿಕ ಸಚಿವ ಸಂಜಯ್ ಕಿಸಾನ್ ಮತ್ತು ಇಂಡಿಯನ್ ಆಯಿಲ್ನ ಹಿರಿಯ ಅಧಿಕಾರಿಗಳು ತೀವ್ರ ಮುಜುಗರಕ್ಕೆ ಒಳಗಾದ ಘಟನೆ ವರದಿಯಾಗಿದೆ.
ಅಸ್ಸಾಂನ ಟಿನ್ಸುಕಿಯಾದಲ್ಲಿ ಶನಿವಾರ ಘಟನೆ ನಡೆದಿದ್ದು, ಅಪರಾಧ ದಳವು ಈ ಸಂಬಂಧ ತನಿಖೆ ಆರಂಭಿಸಿದೆ. ಮಹಾ ಎಡವಟ್ಟಿಗೆ ಕಾರಣನಾದ ಪ್ರೊಜೆಕ್ಟರ್ ಆಪರೇಟರ್ನನ್ನು ಕ್ರೈಂ ಬ್ರ್ಯಾಂಚ್ ಈಗಾಗಲೇ ಬಂಧಿಸಿದೆ.
ಇಂಡಿಯನ್ ಆಯಿಲ್ (Indian Oil) ಟಿನ್ಸುಕಿಯಾದಲ್ಲಿ ಆಯೋಜಿಸಿದ್ದ ಮೆಥನಾಲ್ ಸಂಯೋಜಿತ ಎಂ-15 ಪೆಟ್ರೋಲ್ನ ಪ್ರಾಯೋಗಿಕ ಬಳಕೆಯ ಬಿಡುಗಡೆ ಕಾರ್ಯಕ್ರಮದಲ್ಲಿ ಈ ಮುಜುಗರದ ಘಟನೆ ನಡೆದಿದೆ ಎಂದು ವರದಿಯಾಗಿದೆ. ಕೇಂದ್ರ ಸಚಿವ ರಾಮೇಶ್ವರ್ ತೇಲಿ ಅವರು ಎಂ-15 ಪೆಟ್ರೋಲ್ನ (M-15 Petrol) ಪ್ರಾಯೋಗಿಕ ಬಳಕೆಯನ್ನು ಉದ್ಘಾಟನೆ ಮಾಡಿದ್ದರು. ಈ ಸಂದರ್ಭದಲ್ಲಿ ನೀತಿ ಆಯೋಗದ ಸದಸ್ಯ ಡಾ. ವಿಕೆ ಸಾರಸ್ವತ್, ಇಂಡಿಯನ್ ಆಯಿಲ್ ಅಧ್ಯಕ್ಷ ಎಸ್ಎಂ ವೈದ್ಯ, ಅಸ್ಸಾಂ ರಾಜ್ಯ ಕಾರ್ಮಿಕ ಸಚಿವ ಸಂಜೊಯ್ ಕಿಶನ್, ಅಸ್ಸಾಂ ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್ (ಎಪಿಎಲ್) ಅಧ್ಯಕ್ಷ ಬಿಕುಲ್ ದೇಕಾ ಹಾಗೂ ತೈಲ ಉದ್ಯಮದ ಅನೇಕ ಹಿರಿಯ ಅಧಿಕಾರಿಗಳು ಹಾಜರಿದ್ದರು.
ಪೆಟ್ರೋಲ್ ಬಿಡುಗಡೆ ಕಾರ್ಯಕ್ರಮದ ಬಳಿಕ ನಗರದ ಹೋಟೆಲ್ ಒಂದರಲ್ಲಿ ಸಭೆ ಆಯೋಜಿಸಲಾಗಿತ್ತು. ಈ ವೇಳೆ ಘಟನೆ ನಡೆದಿದೆ ಎನ್ನಲಾಗಿದೆ. ಇಂಡಿಯನ್ ಆಯಿಲ್ ಅಧಿಕಾರಿಯೊಬ್ಬರು ವೇದಿಕೆ ಮೇಲೆ ನಿಂತು ತಮ್ಮ ಭಾಷಣ ಮಾಡುತ್ತಿದ್ದರು. ಮೆಥನಾಲ್ ಸಂಯೋಜಿತ ಪೆಟ್ರೋಲ್ ಯೋಜನೆ ಕುರಿತು ಹಿಂಬದಿಯ ಪರದೆ ಮೇಲೆ ಪ್ರೊಜೆಕ್ಟರ್ ಮೂಲಕ ವಿಡಿಯೋ ತುಣುಕುಗಳನ್ನು ಪ್ರಸಾರ ಮಾಡಲಾಗುತ್ತಿತ್ತು. ಪ್ರೊಜೆಕ್ಟರ್ ಆಪರೇಟರ್ ವಿಡಿಯೋ ದೃಶ್ಯಗಳನ್ನು ಬದಲಿಸುವ ವೇಳೆಯಲ್ಲಿ ನೀಲಿ ಚಿತ್ರವೊಂದರ ತುಣುಕು ಇದ್ದಕ್ಕಿದ್ದಂತೆ ಪ್ರಸಾರವಾಗಿದೆ. ಆಪರೇಟರ್ ಕೂಡಲೇ ಅದನ್ನು ತರಾತುರಿಯಲ್ಲಿ ಬಂದ್ ಮಾಡಿದ್ದಾರೆ. ಆದರೆ ಅಷ್ಟರಲ್ಲೇ 3-4 ಸೆಕೆಂಡ್ ಕಾಲ ಪೋರ್ನ್ ಚಿತ್ರದ ದೃಶ್ಯ ಕಾಣಿಸಿದೆ. ಇದರಿಂದ ಅಲ್ಲಿದ್ದ ಎಲ್ಲರೂ ಆಘಾತಕ್ಕೆ ಒಳಗಾಗಿದ್ದಾರೆ. ಕೆಲವರು ಈ ಘಟನೆಯನ್ನು ತಮ್ಮ ಸ್ಮಾರ್ಟ್ಫೋನ್ಗಳಲ್ಲಿ ಸೆರೆ ಹಿಡಿದಿದ್ದಾರೆ ಎನ್ನಲಾಗಿದೆ.
“ಇಂಡಿಯನ್ ಆಯಿಲ್ ಅಧಿಕಾರಿ ಮಾಡುತ್ತಿದ್ದ ಭಾಷಣವನ್ನು ನಾನು ಕೇಳುತ್ತಿದ್ದೆ. ನಾನು ಪರದೆ ಕಡೆಗೆ ನೋಡುತ್ತಿರಲಿಲ್ಲ. ಹೀಗಾಗಿ ನನಗೆ ಅದರ ಬಗ್ಗೆ ತಿಳಿದಿಲ್ಲ. ಬಳಿಕ ನನ್ನ ಆಪ್ತ ಸಹಾಯಕ ನನ್ನ ಬಳಿ ಬಂದು, ಆ ಘಟನೆ ಬಗ್ಗೆ ವಿವರಿಸಿದರು. ನನ್ನ ಪಕ್ಕ ಡಿಸಿ ಕೂಡ ಕುಳಿತಿದ್ದರು. ತಕ್ಷಣವೇ ತನಿಖೆ ಆರಂಭಿಸುವಂತೆ ನಾನು ಅವರಿಗೆ ಸೂಚನೆ ನೀಡಿದೆ. ಅದು ಸತ್ಯವಾಗಿದ್ದರೆ ತಪ್ಪಿತಸ್ಥ ವ್ಯಕ್ತಿ ವಿರುದ್ಧ ಕಠಿಣ ಕ್ರಮ ತೆಗೆದುಕೊಳ್ಳಲಾಗುವುದು” ಎಂದು ಸಚಿವ ತೇಲಿ ತಿಳಿಸಿದ್ದಾರೆ.
ಪೊಲೀಸ್ ಅಧಿಕಾರಿಗಳ ಪ್ರಕಾರ, ಈ ಘಟನೆಯನ್ನು ಆನ್ಲೈನಲ್ಲಿ ನೇರ ಪ್ರಸಾರ ಮಾಡಲಾಗುತ್ತಿತ್ತು. ಇಂಡಿಯನ್ ಆಯಿಲ್ ಅಧಿಕಾರಿಯೊಬ್ಬರು ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ ಅದರ ಝೂಮ್ ಮೀಟಿಂಗ್ ಐಡಿ ಮತ್ತು ಪಾಸ್ವರ್ಡ್ ಅನ್ನು ಕೂಡ ಹಂಚಿಕೊಂಡಿದ್ದರು. ಟಿನ್ಸುಕಿಯಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
“ಟ್ವಿಟ್ಟರ್ ಖಾತೆಯಲ್ಲಿ ದೊರೆತ ಮೀಟಿಂಗ್ ಐಡಿ ಮತ್ತು ಪಾಸ್ವರ್ಡ್ ಬಳಸಿಕೊಂಡು ಕಿಡಿಗೇಡಿಯು ಜೂಮ್ ಮೀಟಿಂಗ್ನಲ್ಲಿ ಪಾಲ್ಗೊಂಡಿರಬಹುದು. ಬಳಿಕ ಆತ ಝೂಮ್ ಮೀಟಿಂಗ್ನಲ್ಲಿ ಅಶ್ಲೀಲ ವಿಡಿಯೋಗಳನ್ನು ಪ್ರಸಾರ ಮಾಡಿರಬಹುದು” ಎಂದು ಟಿನ್ಸುಕಿಯಾ ಎಸ್ಪಿ ದೇಬೋಜಿತ್ ಡಿಯೋರಿ ತಿಳಿಸಿದ್ದಾರೆ.
